O pasado xoves 19 de maio o
departamento de Relixión organizou unha actividade para o alumnado de 3º e 4º da ESO consistente nunha
excursión pola provincia de Pontevedra.
A primeira parada foi
en Campaña, concello de Valga (Pontevedra), para poder ver as máis de 4000
figuras que compoñen o Belén Artesanal.
O Nacemento combina as escenas relixiosas coas referencias a asuntos da
actualidade. Así, entre os pastores e os Reis Magos, houbo este Nadal
peregrinos que camiñan cara Santiago coas camisetas vermellas da selección
española de fútbol. Tamén hai un concurso para descubrir un famoso oculto.
A segunda parada tivo lugar no
concello de Barro, onde visitamos o Parque
Natural do río Barosa, uns momentos de lecer para poder apreciar un
complexo etnográfico con case vinte muíños en diferente estado de conservación.
O seguinte destino foi a visita
da capela da Nosa Señora da Lanzada,
a capela románica construíuse sobre os restos doutra igrexa máis antiga ligada
á fortaleza construída no século X para defender, xunto ás Torres do Oeste en
Catoira e ás de Cambados, as terras de Compostela dos invasores viquingos e
normandos.
A planta da capela é rectangular,
cunha soa nave en dous treitos separados por un arco sobre piares. Unha bóveda
lixeiramente apuntada forma a cuberta da nave maior. No interior saliente o
retablo barroco onde se atopa a imaxe da virxe da Lanzada.
Así, a capela relaciónase desde a
antigüidade co rito da fecundidade do
baño das nove ondas na praia da Lanzada. Na última fin de semana de agosto,
celébrase a romaría da Virxe da Lanzada. Na noite do sábado acoden centos de
mulleres que desexan acabar coa súa infertilidade, para iso deben someterse ao
baño das nove ondas á media noite. No amencer teñen que ir á ermida e varrer o
chan para desfacer todo tipo de meigallos e males de ollo e, a seguir, realizar
a ofrenda á virxe. Trala misa faise a procesión. Tamén é común que o baño sexa
na noite de San Xoán e non só para obter fertilidade senón para curar doentes e
incluso animais.
Existe outra lenda de fecundidade que
consiste en pór ofrendas florais no chamado leito da virxe, unha rocha que se atopa na rompente da ermida. Antigas
lendas aseguran a existencia de túneles que comunicaban a costa coas illas de
Ons.
Os mariñeiros tamén solicitan os
favores da virxe para os protexer dos perigos do mar, mostra disto dan os
exvotos en xeito de miniaturas de barcos pendurados no interior da capela.
O lugar, antes illa e hoxe istmo,
estivo habitado dende tempos remotos,
testemuño diso son os innumerábeis restos achados tanto no antigo poboado castrexo coma na necrópole que se atopa nas
inmediacións con numerosos restos romanos. No lugar atopábase presuntamente un
faro fenicio ou quizáis romano.
O Xantar fixérono no monte da Siradella, cunhas
espectaculares vistas sobre o istmo da Lanzada, e finalmente, tiveron unhas
horas de lecer na praia de Silgar en Sanxenxo.
